នារីរងគ្រោះត្រូវបុរសពីរនាក់បងប្អូនចាប់រំលោភ
នារីម្នាក់ ត្រូវបានយុវជនម្នាក់ ចាប់រំលោភរហូតបានសម្រេចជាច្រើនដង ហើយកន្លងមកនារីរងគ្រោះ ក៏ត្រូវបានបងប្រុសរបស់យុវជនកំហូចរូបនោះ ចាប់រំលោភនាងបានសម្រេចជាច្រើនដងដែរ ហើយក៏បានរត់គេចខ្លួនបាត់ ។ យុវជនកំហូចជាប្អូនត្រូវបានសមត្ថកិច្ចចាប់ខ្លួន នៅថ្ងៃទី២៣ ឆ្នាំ ២០១៧ នៅក្នុងភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ឯបងប្រុសរបស់គេបានរត់គេចខ្លួនបាត់ ។
ជនជាប់ចោទជាប្អូនមាន ឈ្មោះ ឆក់ ឃុនឆាង អាយុ១៩ឆ្នាំ មានស្រុកកំណើតនៅក្នុង ភូមិភ្នំកុង ឃុំភ្នំកុង ស្រុកអង្គជ័យ ខេត្តកំពត មានមុខរបរ ជាកម្មករស្ថាបនាផ្លូវថ្នល់ និង ស្នាក់នៅផ្ទះជួលនៅក្នុងភូមិកើតហេតុខាងលើ ។ ដោយឡែកបងប្រុសរបស់គេ ដែលរត់គេចខ្លួននោះ ឈ្មោះ ឆក់ ចន្នី អាយុ២៥ឆ្នាំ មុខរបរមិនពិតប្រាកដ មានស្រុកកំណើតជាមួយប្អូនប្រុសរបស់គេដែរ កំពុងរត់គេចខ្លួន ។ នារីជាជនរងគ្រោះអាយុ១៧ឆ្នាំ ស្នាក់នៅផ្ទះជួល ភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
នារីជាជនរងគ្រោះបានប្រាប់ពូបង្កើតរបស់នាងថា យុវជនកំហូចទាំងពីរនាក់បងប្អូននោះ បានធ្វើសកម្មភាពចាប់រំលោភសេពសន្ថវៈលើនាង បានសម្រេចជាច្រើនដង ជាបន្តបន្ទាប់មកហើយ កាលពីអំឡុងមុនពេលបុណ្យចូលឆ្នាំខ្មែរកន្លងមកនេះ រហូតធ្វើឱ្យនាងរងការហើមប្រដាប់ភេទ និង មានការឈឺចាប់យ៉ាងខ្លាំង ។ បន្ទាប់ពីបានដឹងភ្លាម បុរសជាពូរបស់នារីរងគ្រោះ មានការខឹងច្រឡោតយ៉ាងខ្លាំងថា ជនទាំងពីរនាក់នោះ មើលងាយ មើលថោកពូជអម្បូររបស់ខ្លួន ហើយក៏ធ្វើដំណើរទៅកាន់ប៉ុស្ដិ៍ចោមចៅដាក់ពាក្យបណ្ដឹងសុំឱ្យនគរបាលជួយអន្តរាគមន៍ចាប់ខ្លួនបានម្នាក់ ហើយបុរសកំហូចជាបងបានរត់គេចខ្លួនបាត់ ។
នៅចំពោះមុខសមត្ថកិច្ច យុវជនជាប់ចោទបាននិយាយថា រូបគេ និង នាងក្រមុំម្នាក់នោះ មានទំនាក់ទំនងស្នេហាជាមួយគ្នា រយៈពេល៧ខែមកហើយ រហូតឈានដល់ការរួមមេត្រីជាមួយគ្នាបានចំនួន៥លើក ដោយការស្ម័គ្រចិត្តជាបន្តបន្ទាប់ គ្មានការបង្ខិតបង្ខំឡើយ ។ មិនតែប៉ុណ្ណោះរូបគេ និង នាង បានស្រលាញ់គ្នាខ្លាំងណាស់ លុះរយៈពេល២ខែចុងក្រោយនេះ ខ្លួនគេបានសុំលាសង្សារសំណព្វចិត្តទៅធ្វើការជាកម្មករស្ថាបនាផ្លូវថ្នល់ នៅឯខេត្តមណ្ឌលគីរី និង បានប្រាប់ឱ្យនាងនៅរង់ចាំខ្លួនវិលត្រឡប់មកវិញ ។
ប៉ុន្តែក្រោយពេល ដែលខ្លួនចាកចេញទៅធ្វើការការបាត់ នាងបានប្រែចិត្ត ដោយមានទំនាក់ទនងស្នេហ៍ថ្មី ជាមួយនឹងបងប្រុសបង្កើតរបស់ខ្លួន និង បានឈានដល់ការឡើងគ្រែ ជាមួយគ្នា នៅក្នុងផ្ទះជួលបានសម្រេចចំនួន៣ដងទៀតផង ។ ទោះបីជាយ៉ាងណាក៏ដោយ នេះគ្រាន់តែ ជាការចោទប្រកាន់របស់ជនរងគ្រោះ និងជាការដោះសាររបស់ជនជាប់ចោទតែប៉ុណ្ណោះ មានតែតុលាការទេ ដែលធ្វើការវិនិច្ឆ័យបាន ៕ សុថាត់
Post a Comment