តាមប្រពៃណីទំនៀមទម្លាប់របស់ប្រជាជនខ្មែរ នៅក្នុងពិធីរៀបអាពាហ៍ពិពាហ៍គេតែងរកអ្នកកំដរឱ្យកូនក្រមុំ និងកូនកំឡោះ។ តាមទំនៀមទម្លាប់តាំងពីបុរាណមក អ្នកកំដរខាងកូនក្រមុំតម្រូវឱ្យមានចំនួន៣ នាក់ និងកូនកំឡោះចំនួន ៣នាក់ដូចគ្នា ដើម្បីធ្វើជាអ្នកជំនួយដល់កូនក្រមុំកូនកំឡោះក្នុងពិធីរៀប អាពាហ៍ពិពាហ៍។ តាមជំនឿរបស់ដូនតាខ្មែរតាំងពីបុរាណមក គេមិនកូនចៅទៅធ្វើអ្នកកំដរលើសពី៣ដងនោះ ព្រោះមានជំនឿថា អាចនាំឱ្យមានបញ្ហាក្នុងជីវិតមិនចេះចប់។

តាមការរៀបរាប់របស់លោកតាអាចារ្យ ចក់ ឡាង ជាអាចារ្យក្នុងពិធីមង្គលការប្រាប់ថា ក្នុងមួយជីវិតមនុស្សម្នាក់មិនថា ប្រុស ឬស្រី មិនត្រូវទៅធ្វើអ្នកកំដរការគេលើសពី ៣ដងនោះទេ។ មូលហេតុនេះ ព្រោះដូនតាខ្មែរមានជំនឿថា បើអ្នកទៅធ្វើអ្នកកំដរគេច្រើនដងពេក នោះក្នុងជីវិតនឹងជួបរឿងអភព្វ។ ចាស់ៗពីដើមក្នុងសង្គមខ្មែរ មានជំនឿថា អាចនឹងអភព្វមិនមានគូរនឹងគេ បានត្រឹមតែជាអ្នកកំដរគេ ប៉ុន្តែខ្លួនឯងជាមនុស្សអភព្វឥតមានគូរ។ ដូច្នេះហើយទើបដូនតាខ្មែរមិនឱ្យទៅធ្វើអ្នកកំដរគេលើសពី ៣ដងឡើយ។

លោកតាអាចារ្យ ចក់ ឡាង បន្ថែមទៀតថា ប្រសិនបើដឹងខ្លួនឯងថា ធ្លាប់ធ្វើអ្នកកំដរក្នុងពិធីមង្គលការបាន ៣ដងហើយ លើកក្រោយបើមានអ្នកមកសុំឱ្យទៅធ្វើទៀត ដាច់ខាតត្រូវតែប្រកែក ទោះជាមានហេតុផលអ្វីក៏ដោយ។ លោកតា ចក់ ឡាង ប្រាប់ថាទៀតថា តាមជំនឿមិនត្រឹមតែអភព្វដល់ខ្លួនឯងប៉ុណ្ណោះទេ សូម្បីកូនក្រមុំ កូនកំឡោះដែលយកមនុស្សធ្លាប់កំដរការគេ ច្រើនដងនោះមកកំដរក៏អាចជួបរឿងស៊យក្នុងជីវិតដូចគ្នា។តាមជំនឿពីបរមបុរាណមក បើរៀបចំមង្គលការកូនប្រុស កូនស្រី មិនត្រូវយកអ្នកធ្លាប់កំដរចំនួន ៣ដង មកធ្វើអ្នកកំដរទេ ព្រោះដូនតាខ្មែរ ជឿថាមនុស្សនោះជាមនុស្សមានសម្ពាយកម្មជាប់ខ្លួន អាចនាំរឿងមិនល្អក្នុងពិធីមង្គលការ និងក្រោយរៀបការរួច៕