អតីតចៅសង្កាត់ កូនពាក់ផ្កាយ ធ្លាក់ខ្លួនដើរសុំទាន
ភ្នំពេញ: ភ្ញាក់ផ្អើលពីរូបថតលោកតាម្នាក់ ទាំងរាងកាយស្វិតកំព្រឹងស្បែកជ្រីវជ្រួញដណ្តប់ឆ្អឹង ស្តែងយ៉ាងជាក់ពីវ័យជរា មានពាក់តែអាវក្រមាបង់ក និងមួយទៀតស្លៀក ក្នុងដំណើរដើរឆ្លងផ្លូវ ក៏លេចចេញពីទីតាំងយ៉ាងច្បាស់ក្រឡែតនៅដីក្រុងភ្នំពេញ មើលឃើញពីការិយាយល័យរដ្ឋបាលសង្កាត់ចាក់អង្រែលើ ទាំងមនុស្សភាគច្រើនក្នុងបណ្តាញសង្គមលើកឡើងថា៖
«លោកតាម្នាក់នេះឈ្មោះ កែវ គឹមសាន ជាអតីតចៅសង្កាត់ចាក់អង្រែលើ ធ្លាក់ខ្លួនដើរសុំទាន។ ទាំងកូនៗរបស់គាត់ក៏មានស័ក្ដិធំ និងជាអាជីវករនៅផ្សារធំថ្មីទៀតផង»។
ពីបណ្តាញសង្គមហ្វេសប៊ុក ក៏បានរំលេចសារដ៏រំជួលអារម្មណ៍មហាជន ពីរូបភាពលោកតាជរា ដែលគេបង្ហាញអត្តសញ្ញាណថា ជាអតីតចៅសង្កាត់ចាក់អង្រែលើ ពីសំណេរបរិយាយយ៉ាងដូច្នេះថា៖ «ក្លាយជាអ្នកសុំទាននៅផ្ទះកំណើតឯង»។
អតីតចៅសង្កាត់ចាក់អង្រែស្វែងរកទានតាមផ្លូវ។ ហ្វេសប៊ុក
ក្នុងនោះក៏មានការពិពណ៌នាពីរូបភាពដែលបង្ហាញភ្ជាប់នឹងរូបថតលោក កែវ គឹមសាន ដើរឆ្លងផ្លូវទៀតថា «អតីតមេឃុំចាក់អង្រែដែលបានក្លាយជាអ្នកសុំទាននៅលើទឹកដីឃុំគាត់ បងប្អូនអាចឃើញស្លាកសាលាសង្កាត់ចាក់អង្រែលើ នៅចំហៀងខ្នងលោកមេឃុំសុំទាន ដែលកំពុងតែដើរឆ្លងផ្លូវ ហើយបច្ចុប្បន្ននេះ គាត់គ្មានវាសនាត្រួតត្រាលើអគារសង្កាត់នោះទៀតទេ ហេតុអីក៏មនុស្សយើងជាប់កម្មពៀរយ៉ាងនេះ?»។
បណ្តាញសង្គមក៏បង្ហាញថា៖ «តាមការពន្យល់ប្រាប់ពីលោកស្រី ហួត ឃីម តំណាង សសយក ខ័ណ្ឌមានជ័យថា អាជ្ញាធរបានយកចិត្តទុកដាក់ជួយគាត់ហើយ តែបញ្ហាគឺកូនៗគាត់ដែលខ្លះមានស័ក្តិជាឧត្តមសេនីយ៍ ជាអាជីវករលក់ដូរ និងលក់មាសនៅផ្សារថ្មី មិនរវីរវល់ជាមួយគាត់»។
បន្ថែមពីការទទួលស្គាល់របស់លោក ជុំ សាវុត អតីតចៅសង្កាត់ចាក់អង្រែលើ ដែលទើបនឹងចូលនិវត្តន៍ថា៖ «លោក តា កែវ គឹមសាន ពិតជាអតីតចៅសង្កាត់ចាក់អង្រែលើ ធ្លាប់បម្រើការងារនៅសង្កាត់នេះតាំងពីឆ្នាំ ១៩៧៩ លុះកៀកឆ្នាំ ២០០០ ក៏ត្រូវផ្លាស់ប្តូរ លោកក៏នាំប្រពន្ធទៅនៅខេត្តបន្ទាយមានជ័យ» លោក កែវ សាវឿន ដែលជាចៅសង្កាត់ចាក់អង្រែលើបន្តវេន និងកំពុងមាននាទីគ្រប់គ្រងមូលដ្ឋាន ក៏បានបញ្ជាក់ថា៖ «ក្រោយពីគាត់ លោកតា កែវ គឹមសាន ត្រូវបានផ្លាស់ប្តូរ ចេញពីចៅសង្កាត់ ពេលនោះគាត់លក់ផ្ទះនៅក្បែរសាលាសង្កាត់ រួចហើយក៏នាំប្រពន្ធទៅខេត្តបន្ទាយមានជ័យ។ តែមិនដឹងថាយ៉ាងម៉េចទេ ឆ្នាំ ២០១៥ គាត់ក៏នាំប្រពន្ធត្រឡប់ពីខេត្តបន្ទាយមានជ័យវិញក្នុងសភាពខ្សត់ខ្សោយខ្លាំង»។
លោក កែវ សាវឿន បន្តថា៖ «ពេលមក គាត់បានមកស្នើសុំសាលាសង្កាត់ជួយឲ្យដីដល់រូបគាត់មួយកន្លែង ប៉ុន្តែសាលាសង្កាត់ពុំមានលទ្ធភាព ក៏ស្នើសុំព្រះចៅអធិការគណៈកម្មការវត្តចាក់អង្រែលើស្នើសុំដីមួយកន្លែង ឲ្យគាត់ស្នាក់នៅក្នុងវត្ត ហើយថែមទាំងសាងសង់តូបជូនគាត់នៅពីរនាក់យាយ»។
ចៅសង្កាត់ក៏បានបញ្ជាក់ថា៖ «ដ្បិតក្នុងស្ថានភាពបែបនេះគាត់នៅផ្ទះមិនខ្វះសម្ភារហូបចុកទេ។ អង្ករក៏មាននៅក្នុងផ្ទះទាំងបេៗ ដែលខាងសង្កាត់ក៏យកចិត្តទុកដាក់ទំនុកបម្រុងគាត់ រួមនឹងសប្បុរសជន តែគាត់កាលដែលគាត់ទៅសុំទានអីនោះ ដោយសារគាត់វង្វេងផង វ័យដល់ទៅ ៨៤ ឆ្នាំហើយ ហើយណាមួយកូនៗគាត់ក៏មិនសូវជាយកចិត្តទុកដាក់នឹងគាត់ ទើបគាត់គិតច្រើនទៅ ក៏វង្វេងចិត្តទៅ»៕ ប្រភព៖ POSTKHMER
៣កត្តា សង្គ្រោះជាតិនឹងមិនរលាយ
ទោះបីជាបណ្តឹងសុំរំលាយគណបក្សសង្គ្រោះជាតិស្ថិតក្នុងដៃតុលាការកំពូល ព្រះមហាក្សត្របានឡាយព្រះហស្ថលេខាដាក់ឱ្យប្រើប្រាស់ច្បាប់៤ទាក់ទងនឹងការបែងចែកអាសនៈរបស់គណបក្សដែលត្រូវរំលាយត្រូវឱ្យគណបក្សផ្សេង ហើយកាលពីម្សិលមិញ លោក ហ៊ុន សែនបានអំពាវនាវឱ្យក្រុមប្រឹក្សាឃុំ មេឃុំ ចៅសង្កាត់ ជំទប់ មកចូលរួមជាមួយគណបក្សប្រជាជនកម្ពុជាក៏ដោយ តែបើយើងផ្អែកលើកក្តា ៣យ៉ាងដែលជាមូលដ្ឋានដ៏សំខាន់ មិនអាចរំលាយគណបក្សសង្រ្គោះជាតិបានទេ៖១- នៅក្នុងលិខិតចំហ ចុះថ្ងៃទី២៣ ខែតុលា ឆ្នាំ២០១៧ អង្គការអន្តរជាតិចំនួន៥៥ រួមគ្នាស្នើសហប្រធានកិច្ចព្រមព្រៀងសន្តិភាពទីក្រុងប៉ារីស កោះប្រជុំដើម្បីដោះស្រាយវិបត្តិនយោបាយកម្ពុជា។ ក្នុងលិខិតចំហនេះ បានទទូចឲ្យសហប្រធាន និងប្រទេសម្ចាស់ហត្ថលេខីទាំងអស់ នៃកិច្ចព្រមព្រៀងសន្តិភាពទីក្រុងប៉ារីស បំពេញកាតព្វកិច្ចដ៏សមស្របមួយរបស់ខ្លួន គឺកោះប្រជុំប្រទេសហត្ថលេខីទាំងអស់ជាបន្ទាន់ដើម្បីដោះស្រាយស្ថានការណ៍រំលោភសិទ្ធិមនុស្ស រំលោភនីតិរដ្ឋ និងរំលោភប្រជាធិបតេយ្យ យ៉ាងធ្ងន់ធ្ងរ និងយ៉ាងគំហុកនៅកម្ពុជា។
២- កាលពីថ្ងៃទី២៣ ខែតុលា នេះ សមាជិកព្រឹទ្ធសភាអាមេរិកដ៏មានឥទ្ធិពលម្នាក់មកពីគណបក្សសាធារណរដ្ឋរបស់លោក ដូណាល់ ត្រាំ លោក Ted Cruz បានដាក់ឱវាទឱ្យរដ្ឋាភិបាលលោក ហ៊ុន សែន ដោះលែងលោក កឹម សុខា មុនថ្ងៃទី៩ ខែវិច្ឆិកា ឆ្នាំ២០១៧ បើមិនដោះលែង ក្នុងនាមលោកសមាជិកព្រឹទ្ធសភា និងសមាជិករដ្ឋសភាដទៃទៀត រួមទាំងរដ្ឋការរបស់លោក ដូណាល់ ត្រាំ ផងដែរនឹងមានវិធានការណ៍ជាក់ស្តែងលើមន្ត្រីរបស់រដ្ឋាភិបាលកម្ពុជាមួយចំនួនគឺ ការឃាឃាំងមិនឱ្យចូលសហរដ្ឋអាមេរិក។ អាមេរិកអាចបង្កកលុយរបស់មន្ត្រីរដ្ឋាភិបាលបាន ដោយសារការចរាចរលុយក្នុងពិភពលោកត្រូវឆ្លងកាត់ធនាគារកណ្តាលរបស់អាមេរិក។៣-សហភាពសភាអន្ដរជាតិIPUដែលមានប្រទេសជាង១០០ជាសមាជិកបានចេញសេចក្ដីសម្រេចឱ្យកម្ពុជាបញ្ឈប់យន្ដការច្បាប់ដើម្បីរំលាយគណបក្សសង្គ្រោះជាតិ ហើយត្រូវដោះលែងលោក កឹមសុខា ឱ្យមានសេរីភាពឡើងវិញ។ ក្រុមសមាជិកសភារបស់ស្ថាប័នអន្ដរជាតិនេះបានប្រាប់ថានឹងបញ្ជូនគណៈកម្មាធិការស្វែងរកការពិតមួយក្រុមមកកាន់កម្ពុជាក្នុងពេលដ៏ឆាប់ខាងមុខនេះ។ម្យ៉ាងទៀត បើគណបក្សសង្រ្គោះជាតិអវត្តមានក្នុងការចូលរួមការបោះឆ្នោតជ្រើសតាំងតំណាងរាស្រ្តនៅថ្ងៃទី២៩ ខែកក្កដា ឆ្នាំ២០១៨ ខាងមុខ អន្តរជាតិមិនទទួលស្គាល់រដ្ឋាភិបាល នោះនឹងប៉ះពាល់ដល់សេដ្ឋកិច្ច នយោបាយការបទេស ទំនាក់ទំនងការទួត វិនិយោគិនបរទេសជាដើម។ កម្ពុជាជាប្រទេសកម្ពុជាកំពុងអភិវឌ្ឍន៍ ដូចនេះ កម្ពុជាត្រូវការជាចាំបាច់នូវជំនួយបរទេស ការអនុគ្រោះពន្ធនាំចូល ដៃគូសម្រាប់អភិវឌ្ឍន៍ ក៏ដូចជាការធ្វើពាណិជ្ជកម្មជាដើម។ប៉ុន្តែ បើទោះបីជាសង្រ្គោះជាតិនឹងមិនរំលាយក៏ដោយ តែលោក កឹម សុខា ប្រហែលជាមិនអាចចូលប្រឡូកក្នុងនយោបាយតទៅទៀតទេ គណបក្សសង្រ្គោះជាតិត្រូវជ្រើសរើសប្រធានថ្មីជំនួស លោក កឹម សុខា។ រង់ចាំតាមដាន ថាតើការទស្សន៍ទាយដោយផ្អែកលើកក្តាខាងលើនេះ ត្រឹមត្រូវឬយ៉ាងណា?
Post a Comment