ចាប់ជនដ៏សាហាវព្រៃផ្សៃនេះលើទឹកដីសៀមរាប

ខេត្តសៀមរាប ៖ សេចក្តីរាយការណ៍ឱ្យដឹងថា មុននេះ ឃាតករដ៏សាហាវដែលចាក់សម្លាប់អ្នកមើលការខុសត្រូវអ៊ីនធើរណេតក្នុងបន្ទប់ទឹកក្នុងរឿងគំនុំនោះ ត្រូវកម្លាំងសមត្ថកិច្ចតាមចាប់បានហើយ ស្ថិតនៅលើទឹកដីខេត្តសៀមរាប ខណៈជននេះគេចទៅដល់នោះ ។

គួររំលឹកថា ករណីចាក់សម្លាប់បុរសមើលការខុសត្រូវអ៊ីនធើរណេតម្នាក់ បណ្តាលឱ្យស្លាប់ខ្ទាតឈាមពេញបន្ទប់ទឹកនោះ ត្រូវបានសមត្ថកិច្ចក្រុងតាខ្មៅឱ្យកោះសន្តិភាពដឹងនារសៀលថ្ងៃទី០៣ មិថុនា នេះថា មកទល់ម៉ោងនេះ នៅមិនទាន់មានតម្រុយឃាតករកំពុងលាក់ខ្លួននោះឡើយ ប៉ុន្តែកម្លាំងបានកំណត់មុខសញ្ញាស្គាល់មុខនិងស្គាល់ផ្ទះរបស់ឃាតករហើយ គ្រាន់តែសុំមិនទាន់បង្ហាញឈ្មោះនោះ ដើម្បីងាយស្រួលក្នុងការស្រាវជ្រាវរកចាប់ខ្លួន ដោយកម្លាំងកំពុងសហការជាមួយសមត្ថកិច្ចគ្រប់ទីកន្លែងទាំងអស់ ។

ជនរងគ្រោះដែលស្លាប់ខាងលើ ឈ្មោះរ័ត្ន ពុទ្ធថា ភេទប្រុស អាយុ២១ឆ្នាំ មានស្រុកកំណើតនៅភូមិស្តុក ឃុំស្តុក ស្រុកគងពិសី ខេត្តកំពង់ស្ពឺ ស្នាក់និងជាបុគ្គលិកនៅផ្ទះបើកអ៊ីនធើណេតយីហោ «ក្រុងណេត» ភូមិតាខ្មៅ សង្កាត់តាខ្មៅ ក្រុងតាខ្មៅខេត្តកណ្តាល ។

រីឯឃាតករត្រូវសាក្សីម្នាក់បង្ហើបថា មានសម្បុរ.ស ភេទប្រុស អាយុប្រហែល២០ឆ្នាំ ពាក់អាវដៃវែងពណ៌ផ្កាឈូក ស្លៀកខោជើងវែង ពណ៌ខ្មៅ មានស្ពាយកាបូបពណ៌ខ្មៅ ។ សមត្ថកិច្ចឱ្យដឹងទៀតថា នៅថ្ងៃកើតហេតុនោះ ក្រោយឃាតកររូបនេះធ្វើសកម្មចាក់សម្លាប់ជនរងគ្រោះហើយ បានរត់ចេញពីកន្លែងកើតហេតុចម្ងាយ៥០ម៉ែត្រក៏ដោះអាវពណ៌ផ្កាឈូកនោះចេញ ទៅទិញអាវជជុះពាក់ប្តូរវិញ ហើយគេចខ្លួនបាត់តែម្តង ។

នៅព្រឹកថ្ងៃដដែលនេះ កម្លាំងសមត្ថកិច្ចបានចុះទៅដល់ផ្ទះរបស់ឃាតករដែលកំពុងគេចខ្លួននេះ គឺស្ថិតនៅម្តុំរោងចក្របារីមួយកន្លែង(ជិតគល់ស្ពាន) ក្នុងសង្កាត់ចាក់អង្រែលើ ខណ្ឌមានជ័យ ដោយជួបផ្ទាល់ជាមួយស្ត្រីជាម្តាយរបស់ឃាតករ ។ ម្តាយបានឱ្យដឹងថា រូបគាត់មិនបានដឹងរឿងដែលកូនប្រុសធ្វើដល់ថ្នាក់នេះទេ គាត់បានដឹងតាមរយៈការចុះផ្សាយព័ត៌មាន ធ្វើឱ្យភ្ញាក់ផ្អើលយ៉ាងខ្លាំង ។

ប្រភពសមត្ថកិច្ចឱ្យដឹងទៀតថា ឃាតកររូបនេះ ទើបតែលែងលះជាមួយប្រពន្ធ ហើយបានវក់នឹងល្បែងស៊ីសងយ៉ាងខ្លាំង ជាពិសេស គឺល្បែងចាក់បាល់តាមអ៊ីនធើរណេតតែម្តង ដោយមកលេងនៅកន្លែងកើតហេតុខាងលើ ។ លុះលេងយូរៗទៅមិនដឹងថា មានទំនាស់អ្វីជាមួយអ្នកមើលការខុសត្រូវកន្លែងអ៊ីនធើរណេត ទើបឈានចូលចាក់សម្លាប់បែបនេះ ។